5-6 верасня 1951 г.

Таварышы! Мы сабраліся сюды, каб выказаць волю беларускага народа, яго імкненне да міру, яго адзінадушную падтрымку Звароту Сусветнага Совета Міру аб падпісанні Пакта Міру паміж пяццю вялікімі дзяржавамі.

Беларускі народ пад кіраўніцтвам комуністычнай партыі і мудрага правадыра працоўных усяго свету таварыша Сталіна, пры брацкай дапамозе рускага народа і другіх народаў Совецкага Саюза, паспяхова адбудоўвае зруйнаваную вайной гаспадарку. Дастаткова зірнуць на заводы-гіганты, якія ўзняліся ў Мінску, дастаткова прайсціся па новых бульварах, плошчах і вуліцах Мінска, каб зразумець, чаму мы так горача падтрымліваем ідэю міру.

Увесь совецкі народ, залячыўшы раны вайны, гіганцкімі крокамі ідзе наперад, да комунізма. Гулам працы пачынаецца кожны наш дзень на Волзе, на Дняпры, у Сярэдняй Азіі, у Сталінградзе, у Мінску – ва ўсёй нашай краіне.

У той час, калі совецкія людзі распрацоўваюць і змагаюцца за ажыццяўленне планаў новых грандыёзных будоўляў, там, за акіянам, распрацоўваюцца зусім іншыя планы – планы крывавай вайны, знішчэння людзей, заваявання ўсяго свету амерыканскімі міліярдэрамі. Аднак гэтым канібальскім планам не суджана збыцца. Народы свету бяруць справу міру ў свае рукі.

​