Мэты і задачы: прадоўжыць знаёмства вучняў з разнастайнасцю тэматыкі паэтычных твораў, зацікавіць асобай А. Куляшова-паэта; высветліць адпаведнасць малюнкаў прыроды настрою лірычнага героя, развіваць душэўную чуйнасць да лірычных перажыванняў, дапамагчы адчуць сум і горыч ад расстання закаханых, выхоўваць пачуццё прыгожага, імкненне да чысціні чалавечых узаемаадносін; звярнуць увагу на музыкальнасць вершаваных радкоў, падвесці да абагульнення пра асаблівасці інтымнай лірыкі, удасканальваць уменні аналізаваць паэтычны тэкст, развіваць лагічнасць і правільнасць маўлення, пашырыць слоўнікавы запас вучняў.

​

Абсталяванне: партрэт А. Куляшова, запіс песні «Алеся» ў выкананні ансамбля «Песняры», слоўнік літаратуразнаўчых тэрмінаў, памятка «Вучымся чытаць выразна».

​

Апераджальнае заданне: падрыхтаваць невялікае паведамленне на тэму «Жыццёвы і творчы шлях А. Куляшова».

​

Эпіграф:

О, каханне маё бясконцае.

Не ўцякай ад мяне, пашкадуй!

За табой, як за светлым сонцам,

Па штодзённай дрыгве іду.

Уладзімір Караткевіч.

​

Ход урока

I.       Арганізацыйны момант.

Настаўнік. Шаноўныя сябры! Мы зноў сустрэліся з вамі, каб накіравацца ў цікавае і цудоўнае падарожжа ў свет прыгожага і цудоўнага. Жадаю вам творчых поспехаў і выдатнага настрою!

 

II.      Праверка дамашняга задання.

Выразнае чытанне на памяць верша М. Багдановіча «Раманс» (3-4 вучні).

 

III.     Паведамленне тэмы і мэты ўрока.

 

IV.     Вывучэнне новай тэмы.

Настаўнік. Сёння на ўроку мы з вамі працягнем знаёмства з беларускай лірычнай спадчынай і пяройдзем да творчасці Аркадзя Куляшова, выдатнага паэта з чулай душой і палымяным сэрцам. Паслухаем невялікае паведамленне пра жыццёвы і творчы шлях А. Куляшова.

Выступленне вучня

Аркадзь Аляксандравіч Куляшоў – адзін з самых таленавітых паэтаў у беларускай літаратуры, лірык, які тонка адчуваў жыццё, яго плыні і перыпетыі лёсу чалавека. Яго смела можна назваць не толькі рамантыкам і патрыётам, але і выдатным псіхолагам. Нарадзіўся ён у 1914 годзе 6 лютага. Малой радзімай паэта была вёска Саматэвічы Касцюковіцкага раёна Магілёўскай вобласці. Бацькі Аркадзя былі настаўнікамі, таму далі сыну добрае выхаванне, прывілі любоў да прыгожага, навучылі бачыць і адчуваць жыццё. Як і бацькі, паэт абраў сабе педагагічны шлях: у 1928 годзе ён паступіў у Мсціслаўскі педагагічны тэхнікум, затым у 1931 г. перайшоў на першы курс літаратурнага факультэта Беларускага вышэйшага педагагічнага інстытута. Ужо на гэтым этапе жыцця лёс яго быў звязаны з літаратурай. Пазней Аркадзь Аляксандравіч становіцца членам БелАПП, потым працуе ў рэдакцыі газеты «Чырвоная змена» (1934), на Беларускім радыё (1934–1936), у часы вайны Аркадзь Куляшоў працуе ў армейскай газеце «Знамя Советов», а потым у Беларускім штабе партызанскага руху. Пасля вайны паэт спрычыніўся і да мастацтва кіно, ён працуе ў кінастудыі «Беларусфільм» галоўным рэдактарам сцэнарнага аддзела. Быў узнагароджаны двума ордэнамі Леніна, двума ордэнамі Працоўнага Чырвонага Сцяга і медалямі.

З 1968 года прызнаны народным паэтам БССР. Памёр Аркадзь Куляшоў 4 лютага 1978 года. За сваё жыццё паэт выдаў шмат зборнікаў вершаў, надрукаваў і паэмы. Яго творы былі высока ацэнены чытачамі, яны адлюстроўвалі складаны ўнутраны свет чалавека ў розныя часы, падавалі гістарычныя падзеі праз прызму светапогляду сапраўднага грамадзяніна сваёй краіны і проста чуйнага і шчырага сэрцам чалавека.

​