У Маскве знойдзены малавядомыя вершы Аркадзя Куляшова

​

У першы перыяд вайны (з ліпеня 1941 па 1943 год) паэт, як і многія іншыя пісьменнікі, вымушаны быў пакінуць межы радзімы – Беларусі. Працаваў у якасці пісьменніка-франтавіка ў газеце "Знамя Советов" на Паўночна-Заходнім фронце. Кожны дзень чырвонаармейскай газеце быў патрэбны аператыўны матэрыял, які па гарачых слядах адлюстроўваў бы ход баявых дзеянняў.

На старонках франтавой газеты з’яўляюцца вершы Аркадзя Куляшова на рускай мове. Працуючы ў армейскім друку, паэт пісаў не толькі газетныя карэспандэнцыі, але і паспяхова выступаў у такіх новых для яго паэтычных жанрах, як рыфмаваная шапка-лозунг над газетнай паласой, верш-наказ, памфлет, байка, франтавая частушка, сатырычны фельетон. Незвычайна папулярнымі былі яго вершы і гумарыстычная нізка пра байца Аляксея Пятрова (напісаныя ў сааўтарстве з I. Чэкіным). Творчая біяграфія паэта гэтага часу надзвычай плённая. Дарэчы, у сваёй невялікай публікацыі "Фронтовой репортаж", змешчанай у другім нумары часопіса "Нёман" за 1974 год, паэт палічыў патрэбным растлумачыць:

"Творы гэтага перыяду не прэтэндуюць на тое, каб стаяць побач з іншымі вершамі тых гадоў, ужо даўно вядомымі чытачу. Але яны па-свойму дарагія мне. I не столькі тым, што з’яўляюцца першай старонкай маёй армейскай біяграфіі, колькі тым, што ў ёй называюцца салдаты векапомнай вайны, чые справы да гэтага часу трывожаць маю памяць..."

Колькі дзён таму ў рэдакцыю "Рэспублікі" завітала Галіна Рэут, навуковы супрацоўнік Інстытута мовы і літаратуры НАН Беларусі, і паведаміла навіну: будучы ў службовай камандзіроўцы ў Маскве і працуючы ў ваенным фондзе Расійскай дзяржаўнай бібліятэкі, яна знайшла вершы ваеннага часу, напісаныя народным паэтам Беларусі Аркадзем Куляшовым, якія не ўключаліся ні ў адно з выданняў ці збор яго твораў. Прапануем чытачам два з іх.