У літаратуразнаўстве замацавалася думка, што Аркадзь Куляшоў уваходзіў у літаратуру імкліва, рана і стала. Аднак зварот да першых вершаў паказвае, што сапраўдны дэбют быў ранні і паспяховы, але не такі ўжо і сталы, як гэта раней здавалася. Вядома, не браўся пад увагу зусім дзіцячы верш «Ты мой брат», напісаны не столькі ад уласных назіранняў, колькі зыходзячы ад узораў не лепшых варыянтаў агітацыйнай тагачаснай літаратуры. Мною ўжо выказвалася меркаванне, што ў рэдакцыю вучань мог паслаць і іншыя вершы, але рэдакцыя выбрала, няхай сабе і бездапаможны твор у сэнсе паэтыкі, затое надзвычай актуальны для тагачаснай ідэалогіі, акцэнтаваўшай увагу на змычку вёскі з горадам. Гэтаму доказ апублікаваныя ў перыёдыцы вершы ў 1927 і 1928 гадах, пераважна ў «Магілёўскім селяніне». У іх ёсць усё, уласцівае ўзросту пачынаючага паэта: бурлівая радасць, радасць кармазынавых, лясных суніц, дні пурпуровыя, хмялёвы час, несупынны лёскат жыцця і г.д. Гэта ў пэўным сэнсе вызначала яго светаадчуванне, рамантычнае ўспрыняцце жыцця, што яшчэ ішло ад кніжнасці, вобразнасці невялічкіх кніжачак першых маладых паэтаў, што траплялі ў правінцыю, таму і вершы атрымліваліся чыста маладнякоўскія з яе выразнай паэтыкай квяцістасці.

​